Um vefsíðuna og höfundinn – Albert Jónsson

Mars, 2018

Ég hef opnað vefsíðu um utanríkis- og alþjóðamál eftir að hafa nýlega lokið störfum í íslenska stjórnkerfinu. Ég var framkvæmdastjóri öryggismálanefndar á árunum 1987-1991 og eftir það lá leiðin í ársbyrjun 1992 í stjórnarráðshúsið við Lækjartorg til starfa í forsætisráðuneytinu. Þar var ég ráðgjafi forsætisráðherra í utanríkis og öryggismálum í rúm tólf ár en 2004 fór fór ég í utanríkisráðuneytið fyrst í rúm tvö ár sem sérlegur ráðgjafi utanríkisráðherra og síðar sendiherra. Hér má sjá ferilskrá mína

Á vefsíðunni verður bloggað um ýmis og ólík mál byggt á reynslu minni og rannsóknum.  Þar á meðal verða loftslagsbreytingar, norðurslóðamálefni, viðskiptastefna, Brexit, utanríkisstefna Bandaríkjanna, Kína og Rússlands og þróun Evrópusambandsins – og auðvitað verður fjallað um utanríkismál Íslands.

Þessi efni hef ég rannsakað í áraraðir, fjallað um þau og skrifað af margskonar tilefni í störfum mínum í stjórnkerfinu.  Ég hef einnig flutt um þau fjölda fyrirlestra í stjórnmálafræðum við Háskóla Íslands þar sem ég var stundakennari og síðar aðjúnkt í yfir tuttugu ár frá 1982 til 2006.  Haustið 2016 tók ég að mér að kenna helming af námskeiði um það sem er efst á baugi í alþjóðamálum og fjalla þar um Rússland, Kína og loftslagsmál í alþjóðlegu pólitísku samhengi.

Ég geri ráð fyrir að setja stutta ritgerð inn á vefsíðuna einu sinni til tvisvar í mánuði að meðaltali. Í hvert sinn sem ég birti þannig nýja bloggfærslu vek ég athygli á henni í tölvupósti til hóps fólks sem ég tel að hana eigi erindi við. Þú getur verið í þessum hópi hafir þú áhuga. Ef svo er láttu vita og ég set þig á listann.